• Tug cim kem kaab yog siv coj lug kem ob kaab ntawv kws puas leej sau kawg, tab sis has txug ib lub tswv yim los yog dlaab tsis muaj ntsiv sis thooj xwb.

Piv txwv:

1. Kuv tshaib plaab; kuv noj mov.
2. Muaj kaum leej moog; peb tug lug xwb.

• Muaj tej zag kuj siv le nuav hab yog tas cov lug siv ntawd tub muaj tug cim kem lug lug xyaw lawm.

Piv txwv:

1. Nwg tuaj moog nyob tsua St. Paul, Minnesota; Fresno, California; hab Merced, California.
2. Cov Moob kws muaj npe nrov yog Vaaj Pov, kws tub rog; Yaaj Ntaus, kws qha ntawv; hab Mim Muas, kws ua nom.

• Yog cov kaab ntawv kws muaj ob lu lug le "tab sis" los yog "piv txwv," siv tug cim kev lug los tug cim kem kaab los tau tuab yaam.

Piv txwv:

1. Kuv tub yuav hu tuaj, tab sis koj ho hu tuaj tsua kuv lawm.
2. Kuv noj ntau yaam zaub mov; piv txwv, nqaj qab, nqaj npuas, hab nqaj ntseg ntxuag zaub ntsuab.
3. Thaum kuv paub lug Meskas zoo zog, kuv ntsha hab; tab sis, kuv tsi ntshai npaum le thaum kuv tseem tsi tau paub le.